Տանը կամ բնակարանում հարմարավետության և յուրօրինակ միջավայրի ստեղծման գործում մեծ դեր է խաղում ինտերիեր դիզայնի ոճը: Ձեր բնակարանին համապատասխան ոճ ընտրելու համար առաջարկում ենք ծանոթանալ առավել տարածված ոճերին և դրանց առանձնահատկություններին:

Դասական ոճ

Ինտերիեր դիզայնում հաճախ նախապատվությունը տրվում է դասական ոճին: Այն բնութագրվում է շքեղությամբ, նրբաճաշակությամբ և վեհությամբ: 

Նրա բնորոշ հատկանիշներն են՝

• ճարտարապետական խոշոր դետալները՝ սյուները, որմնախորշերը, քիվերը և այլն.
• համաչափ դասավորությունը.
• հարդարումը թանկարժեք նյութերով՝ մարմարով, գրանիտով, դիզայներական պաստառներով և այլն.
• չեզոք գույները և ոսկեգույն դետալները.
• շքեղ կահույքը:

Նեոկլասիկ ոճ

Նեոկլասիկ ոճն ինտերիերում առանձնանում է նրբագեղությամբ և ներդաշնակությամբ՝ համատեղելով պահպանողական մոտեցումն ու ֆունկցիոնալությունը:

Այս ոճի առանձնահատկություններն են՝

• համաչափությունն ու հավասարակշռված կոմպոզիացները.
• ուղիղ գծերն ու հստակ ձևերը.
• դասական տարրերը՝ քիվերը, սյուները և այլն. 
• չեզոք և նուրբ երանգները.
• բնական և բարձրորակ նյութերը:

Մինիմալիզմ

Մինիմալիզմը բնութագրվում է պարզությամբ և ֆունկցիոնալությամբ: Այս ոճում ընգծվում է ընդարձակության և լույսի կարևորությունը, ինչի շնորհիվ սենյակում ստեղծվում է հանգստության և ներդաշնակության զգացում։ 

Մինիմալիզմի բնորոշ հատկանիշներն են՝

• չեզոք և բնական գույների, առավելագույնը երեք հիմնական երանգի օգտագործումը.
• քարերի, կաշվի, փայտի և բնական այլ նյութերի կիրառումը. 
• ազատ տարածության՝ հնարավորինս շատ տեսողականորեն ընդլայնումը ներկերի, առանց նախշերի պաստառների, կահույքի ապակե տարրերի շնորհիվ. 
• մեծ պատուհանների կիրառումն ու վառ լուսավորության ապահովումը.
• իրերի բազմաֆունկցիոնալությունը (օրինակ՝ բազմոց-մահճակալ, տրանֆորմեր սեղան).
• փակ և չերևացող պահոցների առատությունը.
• դեկորատիվ տարրերի նվազագույն օգտագործումը:

Մաքսիմալիզմ

Ինտերիեր դիզայնում մինիմալիզմի հակադիր ոճ է համարվում մաքսիմալիզմը, թեև դիզայներների մի մասն այն չի դիտարկում որպես առանձին ոճ: Մաքսիմալիզմի դեպքում ստեղծվում են հետաքրքիր համադրություններ՝ յուրաքանչյուր անկյուն լցնելով էներգիայով: Այս ոճը հիմնականում նախընտրում են ստեղծագործ անհատները, որոնք սիրում են արտասովոր լուծումներ: 

Մաքսիմալիզմը բնութագրվում է՝ 

• վառ գույների և տարատեսակ նախշերի կիրառմամբ. 
• մետաքսի, թավշի, մարմարի և այլ շքեղ նյութերի օգտագործմամբ.
• դեկորատիվ տարրերի՝ նկարների, բարձերի, գորգերի և այլնի առատությամբ. 
• տարատեսակ նյութերից պատրաստված արտասովոր ձևի կահույքով.
• վառ և մեծ ջահերի օգտագործմամբ:

Մոդեռն ոճ  

Ինտերիեր դիզայնի ոճերի շարքում ուրույն տեղ է զբաղեցնում մոդեռնը: Այն հրաժարվում է ճարտարապետական ավանդական սկզբունքներին հետևելուց՝ նախապատվությունը տալով տարբերվող և նորարարական լուծումներին:

Նրա առանձնահատկություններն են`

• կորությունները, սահուն անցումները և անհամաչափությունը.
• բույսերի և բնական նյութերի կիրառումը.
• պատերի միագույն հարդարումը մեղմ երանգներով.
• ապակե, բրոնզագույն և պողպատագույն տարրերով փայտե կահույքը: 

Լոֆթ ոճ 

Ինտերիեր դիզայնի ժամանակակից ոճերից մեկը լոֆթն է, որը մարմնավորում է ինքնատիպությունն ու ստեղծարարությունը: Այն չի ենթարկվում հստակ կանոնների. հնարավորություն է տալիս համադրել տարատեսակ տարրեր և ստեղծել բնակիչների ապրելակերպին համապատասխան յուրօրինակ միջավայր՝ լի ազատության շնչով:

Նրա բնորոշ հատկանիշներն են՝

• բաց տարածությունը՝ նվազագույն քանակի պատերով և մեծ պատուհաններով.
• բարձր առաստաղները՝ չծածկված խողովակներով և օդափոխության համակարգերով.
• արդյունաբերական տարրերը՝ աղյուսե շարվածքը, չհղկված սվաղը, բետոնե ծածկույթը. 
• մինիմալիստական ոճի ֆունկցիոնալ կահույքը:

Ինտերիեր դիզայնի տարբեր ոճերի միջև ընտրությունը կախված է սենյակի առանձնահատկություններից, ճարտարապետական լուծումներից, ինչպես նաև ժամանակակից միտումներից, բյուջեից, անհատական ​​նախասիրություններից ու պահանջներից և այլն: 

Կիսվել հղումով՝

Կամ

Պատճենել հղումը